الزوامل والأغاني بتطنطن ملاان الشارع فوق السيارات والموتورات وحظية بتتنبع من طاقه لطاقه تبسر ماهو الخبر.

حظية: ماقد معاهم هولاء مايشتوا؟! جننونا بالأغاني والزوامل ملان الشوارع.

حمود:هولاء معاهم احتفال ياحظية،احتفال يوم ما دخلوا البلاد ويشتونا نسير نحتفل معاهم.

حظية: احتفال بمه أمانه عليك بالكهرباء الذي مازد ابسرناها من حين دخلو ولا بالوايت الذي بيجي كل شهر ولا بالغاز الذي قد وصل ل5500 ولا بأسعار المواد الغذائية اللي قد أسعارها ضعفين وتموها حين قطعوا الرواتب وموتو الناس جوع.

حمود: قدوه هكذا الخبر خربوا البلاد وسرقوها وقتلوا ناسها وبزوهم من بيوتهم والمساجد ورجعوا يصيحوا لنا نخرج نحتفل معاهم بيوم النكبة.

حظية: والله انه يوم النكبة العالمية صدق،زيدوا كل شي الأسعار والمقابر والأيتام والأرامل والسجون والمختطفين والسلاح وكلله كثر خيرهم الصدق.

حمود: ولاتنسيش زاد الفقر والتسول والبطالة ومامعاهم مهرة غر سرق الزلط من الناس ساعة مجهود حربي ساعة مولد نبوي المهم من هي مهرته لو يقطعوا نخرته.

حظية: وكل يوم يطلعوا لنا بخبر يوم تغيير المناهج والدين ويوم الولاية للسيد وكل يوم خبر.

حمود: ههههه ماشاء الله علينا قد أدينا كل منجزات نكبة الحوثي المفروض يفعلوا لنا برنامج إذاعي.

حظية: هههه قد كل الشعب حافظها مش غر انا وانت،وبعدا المفروض نحتفل بثورة 26سبتمبر اللي خرجت اليمن من الظلمي للنور مش نكبة 21 اللي ردتنا لعهد الإمامة.

حمود : والله انه صدقش ماثورة إلا ثورة 26سبتمبر ثورة الوطن  وعنحتفل بها احنا
وقد قالها الأوليين: حب الوطن مش بالشهادات.



المقال خاص بالعاصمة أونلاين يرجى الاشارة للموقع عند اعادة النشر