ابسرت حظية زوجها مقمبر بزوة المكان مطنن وشكله طااافح، وذكرت جهالها اللي قد أهرموها يشتوا حاجات المدرسة قالت تسير تحاكيه فرصه حينو هانا.

حظية: حمووود قد عيالك شغلوني في روحي يشتوا أدوات المدرسة ايحين عتشتري لهم زي وشنطة ودفاتر وأقلام و....ماعباقي غر أسبوعين للقرايه. 

حمود: قولي لهم مابش سيرة المدرسة تيه السنة يقمبروا في البيت عد اقريهم انا.

حظية:ماهووو بغير جنان ياحمود إنا عتحرم عيالك من المدرسة عسب ماتشتري لهم الزي والشنطة!!؟

حمود: مشو عسب ذيه ياحظية اتقرصي العافية وريحي لش من تجاهي ذيه الساع عد احاكيش بعدا.

حظية: ماعد ارحليش ياحمود لووما تحاكيني ذحينه ماهو السبب اللي خلاك تمنع عيالك من القرايه!؟ هذا وانت المتعلم والمثقف ياسعم!!

حمود: آحح منش ياحظية ومن لسانش الطويل ذيه، ناهي خلاص عد احاكيش ابرد من لسانش.

حظية: ايووه قول هكذا من الصبح ولا ضروري أطول لساني عسب تستضيني هههههه.

حمود: اقولش هولاء الجن فعلوا كارثة كبيرة غيروا مناهج المدرسة حق الطلاب ودخلوا فيها حقهم الخرافات والعقيدة الفاسده عسب يخربوا عقول جهالنا ويصنعوا لهم جيل فاسد وبعيد عن الدين.

حظية: يوه والفعلة ماتيه الا كبيرة وكبييرة قوي، حتى جهالنا ماخلوهم في حالهم، قد كودا بنلاحقهم ملاحقة يسيروا يصلوا ويقروا قرآن،، عاد عيمسخوهم هم في المدرسة!! قدو الجنان؟ وبعدا قولي ماغيروا ماهو؟؟

حمود: يااي لو تبسري ماهو كتبوا شعار صرختهم وهدار على سيدهم وأشعار ولا كأنه رسول وبيدوا عليه قصص خررط غر فطستني من الضحك.

حظية: ضحكني معك أمانة قد كل شي بيدي البكاء تيه الأيام.

حمود: قلش مره حسين الحوثي وهو مسافر من مران لاقى بركة ماء وبعدا جلس ودخل أرجله والسمك اتجمعين لعند أرجله هههههههههههه.

حظية: ههههههه من ايحين به ماء في مران ولا حتى سمك صدقني أنه ما لاقى غر مستنقع واتجمعين الديدان والشوصر لعند أرجله.

حمود: هههههههه والله انش اديتيها وذكرتيني زد بواحدة بدل ماكان مكتوب انا أحب أبي صالح وأمي أروى قدكتبوا (( قال جبريل: أنا أحب أبي عبدالملك وأمي فاطمة)).

حظية: يوه يوه يوه لطفك ياالله وبعدا ما اختاروا غر اسم جبريل!؟ ومن أبوه عبدالملك الجني حقهم!!!!

حمود: قد عصدوا الدنيا عصيد والجاهل مشو سع الكبير ياحظية ماعيدراش الصدق من الخرط والصح من الغلط لازم يسمع كلام الأستاذة ويحفظ اللي في الكتاب عسب ينجح وبعدا عترسخ في عقله كل المعلومات الغلط حين هو طفل.

حظية: والله إنه صدقك ياحمود وأكثر شي بيأثر على الجاهل بعد أمه وأبوه المدرسة قدوه لاقالت لهم الأستاذه حاجه بيهرموني هرم وماعد بيسمعوش رأيي يمكنوني الأستاذة قالت... الأستاذة قالت...

حمود: اكيد عيفعلوا هكذا قد المدرسة بيتهم الثاني،، وبعدا من عيرضى يخرب عقيدة ابنه وعقله قد كل الأباء والامهات رافضين لتعديل المناهج ذيه ومقررين ان عيالهم مايسيروش المدرسة لوما يلغوا ذيه التعديل.

حظية: وهذا هو الصح لو كلنا نرفض ذيه القرار ونكون كلمة واحدة عنستر نمنعهم لوما نقلعهم من عندنا بإذن الله واللي بيوقع جزاتنا حين سكتنا لهم من حين جو

وقد قالها الأولين: فتحنا للدمي يتشقر دخل يرقص

<Sham>                        


المقال خاص بموقع العاصمة أولاين نرجوا الاشار للمصدر عند اعادة النشر